“Беҙ инде хәҙер ҙурҙар,
мәктәпкә илтә юлдар”
(Әҙерлек төркөмөндә асыҡ дәрес)
Тәрбиәсе:Иҫәнбаева С.Ф.
2023 й.
Маҡсат:
-Балалар баҡсаһында өйрәнгән белемдәрҙе дөйөмләштереү;
-Балаларҙың бәйләнешле тасуири телмәрен үҫтереү, һүҙ байлығын арттырыу;
- Фекер йөрөтөү, тулы яуап биреү, тиҙ иҫәпләү күнекмәләрен үткәреү, һүҙ һәм һүҙбәйләнештәрҙе төрлө ваҡытта ҡуллана алыуҙарына ирешеү,һанау эшмәкәрлеген нығытыу ;
-Мәктәпкә, китапҡа һөйөү, ҡыҙыҡһыныу, һаҡсыллыҡ, уҡытыусы хеҙмәтенә хөрмәт тәрбиәләү, ихтирам, һөйөү хистәре уятыу.
Йыһазландырыу: һүрәттәр, әкиәттәргә иллюстрациялар, хәрефтәр,ребустар,геометрик фигуралар, аудио яҙма.
Әҙерлек эше:
-Сюжетлы-ролле уйын “Мәктәп”.
-Әкиәттәр менән танышыу.
-Мәктәп, китап тураһында әңгәмә.
-Мәҡәлдәр өйрәнеү.
-Дидактик уйындар.
Белем биреү өлкәләренең интеграцияһы: “Математика”,” Телмәр үҫтереү”,” Тирә-яҡты өйрәнеү”, “Аралашыү”,” Музыка”, “Физик культура”.
Дәрес барышы
Ойоштороу:
-Һаумыһығыҙ балалар! Бөгөн беҙгә ҡунаҡҡа һеҙҙең әсәйҙәрегеҙ һәм буласаҡ уҡытыусығыҙ Мәүсилә Исмәғил ҡыҙы килгән,әйҙәгеҙ улар менән иҫәнләшәйек.
Төп өлөш:1) Мәктәп тураһында әңгәмә.
Нисә йыл инде бына,
Майҙың ошо көнөндә
Беҙҙең матур баҡсабыҙға
Мәктәптән хәбәр килә.
Беҙҙең баҡса балаларын
Уҡытыусы апайҙар,
Беренсе синыфҡа тип ,
Мәктәпкә саҡыралар.
-Балалар һеҙ мәктәпкә барырға әҙерһеҙме?
Улай булғас хәҙер тикшереп ҡарайбыҙ.
Бер йомаҡ тыңлағыҙ әле:
Уҡырға ла өйрәтә,
Яҙырға ла өйрәтә.
Уны белә һәр кеше,
Ул була (уҡытыусы)
1 –се сентябрь һеҙ мәктәпкә бараһығыҙ, һеҙҙе кем ҡаршы ала ?(уҡытыусы)
Мәктәптә уҡыған балаларҙы кем тип атайҙар? (уҡыусылар)
Уҡыусылар ниндәй билдәләрҙе бик яраталар? (5-ле ,4-ле)
Ошо билдәләрҙе алыр өсөн бик тырышып уҡырға, уҡытыусы апайҙы тыңларға кәрәк.
2) Һүрәттәрҙән һүҙ төҙө .Өн-хәреф уйыны.
- Ә хәҙер әйҙәгеҙ бер уйын уйнап алайыҡ.
К- КИШЕР,И-ИКМӘК, Т-ТУП, А-АЛМА, П-ПЕНАЛ.
-Ниндәй һүҙ килеп сыҡты
-Китап тураһында нимәләр беләһегеҙ
Йомаҡ
Ҡат-ҡат ҡатлама,
Аҡылың булһа ташлама.
Мәҡәлдәр
Китап –белем шишмәһе
Уҡыған кеше уңыр- уҡымаған туңыр
Китап уҡыһаң белемең артыр-уҡымаһаң белгәнең онотолор
Урманға сәйәхәт.
-Ә хәҙер беҙ һеҙҙең менән сәйәхәткә сығабыҙ,тик юлда һынауҙар буласаҡ, һеҙ әҙерме?
Ял минуты:
Балалар,балалар
Урман буйлап баралар.
Тәбиғәтте ҡарайҙар,
Ҡояштың йылыһына,
Ҡулдарын йылыталар,
Күбәләк күҙәтәләр,
Уның кеүек осалар:
Бер,ике,өс,дүрт,биш.
Сәскәләрҙе йыялар:
Берәү,икәү,өсәү,дүртәү,бишәү.
Гөлләмәләр эшләйҙәр.
Беҙ урманға килеп еттек, юлда нимә күрәһегеҙ? (Алмағас)
Артабан юлды дауам итәр өсөн Алмағасҡа ярҙам итәргә кәрәк:
“Минең алмаларымды ашаһағыҙ юлығыҙ уңыр”-ти Алмағас.
-Был Алмағас ниндәй әкиәттән ?(“Ҡаҙҙар –аҡҡоштар”)
-Дөрөҫ, афарин!
-Беҙгә берәмләп сығып Алмағастың алмаларын ашарға кәрәк.
1) Шарадалар (Уйын-йомаҡтар)
Бер өлөшө , ай-һай әсе,
Икенсеһе төҫ була...
Бергә ҡушып, ҡороп ҡуйғас,
Ҡуян эләгеп ҡуя.(тоҙ-аҡ)
Тоҙаҡ һүҙен аңлатыу.
2) Аҡ һүҙенән яңы һүҙҙәр уйлау
(Аҡ-аҡлан,аҡса,аҡһаҡал,аҡһыл,аҡһым,аҡман,аҡыл,аҡтыҡ.)
3)Ҡуян тураһында хикәйә төҙөү( Синквейн)
Ял минуты:Уйын :“Йәнле-йәнһеҙ тәбиғәт”
Алтын һарайға сәйәхәт.
-Сәйәхәтебеҙҙе дауам итәбеҙ.
-Беҙ Алтын һарайға килеп еттек, һеҙгә бер сер әйтәм, ошо һарай эсендә тылсымлы һандыҡ бар, һандыҡ эсендә нимә бар икәнен белгегеҙ киләме?
-Минең дә белгем килә, тик һарайға инер өсөн асҡысын табырға кәрәк.Ҡайһы асҡыс икән, белмәйһеҙме?
1Асҡыс:Ребустар
2Асҡыс :Геометрик фигуралар менән эш.
3Асҡыс :Һорау-яуап.
*Бер аҙнала нисә көн?
*Хәҙер ниндәй йыл миҙгеле?
*Беҙҙең Республикабыҙ нисек атала?
*Башҡортостандың баш ҡалаһы?
*Ауылыбыҙ нисек атала?
4Асҡыс:Ҡыҙыҡлы күнекмәләр.
*Әсәйҙең ҡыҙы Алһыу,улы Наил, эте Һарыбай, бесәйе Мыраубикә булған.Әсәйҙең нисә балаһы булған?
*Ағас башында 4 ҡош ултыра,2-һе ҡарға, ә ҡалғандары сыйырсыҡ.Ағас башында нисә сыйырсыҡ ултыра?
*Ике атта нисә аяҡ?
*Өс бүрелә нисә күҙ?
*Өсмөйөштөң нисә мөйөшө бар?
*Бер ҡулда нисә бармаҡ, ә ике ҡулда?
*Өс бесәйҙең нисә ҡойроғо?
-Бына балалар асҡысты таптыҡ, әйҙәгеҙ асып ҡарайыҡ нимә икән һандыҡ эсендә.Бында бит йондоҙҙар, яҡшы яуап биргән балаларға.
(Бүләктәр тапшырыү)
Йомғаҡлау:
-Бөгөн беҙ һеҙҙең менән мәктәп тураһында һөйләштек. Һеҙ инде белем донъяһының беренсе баҫҡысын үтеп бараһығыҙ.Ул-балалар баҡсаһы.Икенсе баҫҡыс- мәктәп, белем алыуҙың ҙур тормош юлы.
-Һеҙ балалар баҡсаһында нимәләргә өйрәндегеҙ?
-Бөгөнгө дәрес оҡшанымы?
-Нимәләр эшләнек дәрестә?
-Ошоноң менән дәресебеҙ тамам, мин һеҙгә уңыштар теләйем, тырышып уҡығыҙ, уҡытыусы апайығыҙҙы тыңлағыҙ,татыу, бер –берегеҙгә ярҙам итеп уҡығыҙ!